Büyük Türkiye Parkı Açılış
Bu gözäl açılışa pek çok insan katıldı, bukadar kalabalık, bitkii kerä burada 80-nci yıllarda olmuştu.
257 defa okunmuş - 18 Ocak 2019 - Cuma 08:13

«Kazayak büük Türkiye parkı» kapularını açtı

Bu gözäl açılışa pek çok insan katıldı, bukadar kalabalık, bitkii kerä burada 80-nci yıllarda olmuştu. Kazayaklıların sevinmeliini geldilär paylaşmaa Moldovanın prezidenti İgor Dodon, Gagauziyanın başkan İrina Vlah, Azerbayvan büükelçisi, Türkiye, Ukrayna büükelçiliklerin temsilcileri, TİKA koordinatru hem 14 devlettän katılımcılar, artistlär.

 

  

Hepsi musaafirleri hem küülüleri giriştä tuz hem ekmeklän, adetçä karşıladılar halk giimnerinnän gençlär. Kesildi kırmızı açılış şiridi da hepsini buyurettilär tanışmaa parktakı eniliklärlän.

Gelenneri mutlu etti görüntülär, çünkü her yaşta insana deyni burada var oturmak hem oyun erleri.

Yaklaşık üç ektarlık erdä su baalantısı yapılmış üç çöşmä, fontan, maasus örümäk hem kaçmak yolu, bisiklet yolu, fitnes hem turniklär bölgesi, üç kaygannı-sallangaçlı uşak oyun parkı, masa oyunnarı için er, 11 örtülü –masalı oturacek erlär, patçaazlar, sţena, pıtikalar, ana yol hem biyaz evlilik yolu donadılı gözäl aksesuarlarlan. Parkın her tarafında gözletmäk kameraları da erleştirildilär ki hırsızlıklar hem kötü olayları çıkarannar çabuk belliedilsin deyni.

 

Hepsi sport hem park için tertiplär getirildi Türkiyadan kardaş hem dostluk baalantıları olan primariyalardan. Kazayak küüyünä yardım verän primariyalar Ankaradan kardaş Keçiören, Altındaa, Gölbaşı; Bursadan – Osmangazi; İsparta, Karatay, Nevşehir – Ortahisar; İstanbul-Büükçekmece primariyaları.

 

İşlär parkın enilenmesi için yapıldı bütün küülän barabar. Hepsi yollar, kazmak, ekmäk işleri, oyun parkların, patçaazların hem başka tertiplerin erleştirilmesini erli insannar yaptılar. Parkın düzenini kurmaa katıldı pek çok kazayaklı, elbetki Primariya hem aylarlan işlerin başında Türkiya-Moldova Dostluk dernään başı Rafet Köksal bulundu. Büü-küçüü, üürenicisi hem yaşlısı, sabaalendän avşoma kadar aylarlan burada işledilär. Kazayaklılar hem Türkiyadan uzmannar pek kämil bir dinnenmäk bölgesini üzä çıkardılar.

Eski zamannar gibi, Pazar günnerindä, Kultura Evinin işçileri parkta muzika da açerlar, insannar burada kendilerini raat hem mutlu duyerlar, isteyennär oynêêr, isteyän geziner, oturêr, dostlar arasında kutlama yapêr. «Kazayak büük Türkiye parkında» gözäl vakıt geçirmää deyni artık dolay küülerdän hem aşırıdan da musaafirlär gelerlär. Hepsinä hayırlı olsun ortaklarlan, birliktä hem dostlukta yapılan izmet.

Sağ üst butonu tıklayarak geri dönebilirsiniz...