90-cı YILDÖNÜMÜNÜ TAMAMNADI TC DOKUZUNCU CUMHURBAŞKANI - SULEYMAN DEMİREL
2367 defa okunmuş - 06 Kasım 2014 - Perşembe 19:32

      Kasım ayın 1-si, güneşli hem ilin lüzgercik esmeli bir havaydı. Renkli yapraklar, yavaşça koparak, aşaa doru inip, erlerä döşenärdi. Bu gün önemli bir gündü... Duuma gününü kutlardı büük politika adamı, büük insan, büük Boba. Ölä onu bilerlär hem tanıyerlar dünnedä.

     Dooruluu, demokratiyayı ön plana süreräk, halkına sayısız izmetleri getirdi. Türkiyada,  Demirelin adını bilmeyän insan yok. İşini, yaşamasını ölä kurmuş ki, büün dä, gelincä 90 yaşına, hep halkın sevilän lideri sayılêr.

     Suleyman Demirel, Moldovanın hem Gagauziyanın da büük dostu, çünkü Gagauzlar için önemni 90-cı yıllarda çetin adımnar attı, ikili devlet uurunda görüşmelerdä dooru sözlär kullandı , ki büün avtonnomiya var, var küçük kardaşlar, ani bu adımnarı bilerlär, sayêrlar hem unutmıyceklar. Suleyman Demirelin, akıllı hem dooru politikasını bilerlär hem saygı duyerlar Moldovanın öndercileri dä. Geçti 20 yıl, ama dostluk kesilmedi, o yıllarlan kaavileşer hem taa paalılanêr.

     90-ci yıldönümünnän kutlamaa TC dokuzuncu cumhurbaşkanını Suleyman Demireli geldilär Moldovanın büükelçisi Türkiyada İgor Bolboçeanu, Türkiye-Moldova Dostluk dernään başı Rafet Köksal, Meydan gazetasının baş redaktoru İvanna Köksal.

    Büükelçi, İgor Bolboçeanu, getirdi Moldovanın prezidentindän Nikolae Timoftidän düüma günü kutlamasını, verdi Moldovanın ilk prezidentinin Mirça Snegurun baaşışını, angısını, o, özel bu gün için, hazırlatmış eski dostluk günnär hatırına. İgor Bolboçeanu Moldova elçiliin adından da hazırlanan baaşışları Suleyman Demirelä verdi. Çok şükürlü sözleri söledi iki devletin arasındaki baalantıları için, angılarını başlattırdı hem ilerletti Demirel.

Kutlamalarının en gözäl noktasını koydu sekiz yaşındakı Dilara Köksal, o okudu Demirel bobaya duuma günü kutlaması şiirini.

Suleyman Demirel şükür etti gelän delegaţiyaya kutlama viziti için, söledi selämnarı Moldova devletinä, Gagauz avtonomiyasına.

Meydan gazetası olarak biz da dokuzuncu cumhurbaşkanın sayın Suleyman Demirelin 90-cı yıldönümünü kutlêêrız, saalık hem uzun ömür dileriz.

                                                                                                                            İvanna Köksal

Foto: Moldova büükelçilii Türkiyada

İlgili Fotoğraflar
90-cı YILDÖNÜMÜNÜ TAMAMNADI TC DOKUZUNCU CUMHURBAŞKANI - SULEYMAN DEMİREL
Sağ üst butonu tıklayarak geri dönebilirsiniz...