MOLDOVAnın KULTURA BAKANI GAGAUZİYADAYDI
1601 defa okunmuş - 04 Haziran 2014 - Çarşamba 14:19

  Gagauziyanın Regional bibliotekasında aprel ayın bitkisindä Moldova Respublikanın Kultura ministrusu Monika Babuk buluştı kultura uurunda işçilärlän.

  En ilkin yapıldı toplantı başkannan Mihail Formuzallan, sora musaafir geçti Regional bibliotekasına. Hep o günü M.Babuk dolaştı Beşalma hem Avdarma küülerin muzeylerini, üürendi oralarda sık karşılaşan problemneri.

  Genel toplantıda sayın Babuk okudu hazırladıı geniş dokladını kultura uurunda durumu için. Sıraladı, ani var pek çok çözülmedik problemnär, hem pek önemni cannandırmaa Kultura Evlerinin işini. Annattı, ani kulturacıların üüseltmäk kazanç paraları için moment er alêr ministerliin hazırladıı eni strategiya planında.      Düşünüler, ani stimul işä yarayacek da bu sferada işleyän insannar taa havezlän izmet edäbileceklär halkına. Nışannadı ministru, ani toplu kolektivlerin dä ödek paraları pek düşük, bu uurda lääzım kendimiz dä aarayalım sponsor, yardımcı – ozaman var nasıl çok iş başarmaa... O söledi, ani lääzım gitmää Evropaya dooru, ama bozmamaa kurulmış baalantıları doou taraflan, çünkü Moldova Evropalı bir devlet.

  Musaafir nışannadı gagauz kolektivini “Kadınca”, ani pek gözäl pay almış “Martişor” festivalindä. Kendi konuşmasından sora ministr cuvap etti sorulan soruşlara hem sık-sık urguladı, ani lääzım korumaa tarafımızın kultura zenginniklerini. Söledi, ani Gagauzlar pek unikal türkdilli hem provoslav bir halk, o meraklı geler bütün dünneyä, ani Moldova esaba alêr Gagauzların kulturasının korunmasını hem ilerlenmesini.

  Hep bu buluşmada sözünü söledi Gagauziyanın Kultura bakanı Vasiliy İvançuk. O kısadan annattı bakannıın işi için, nışannadı problemneri hem istedi yardım ministırdan onnarın çözülmesi için.

  Çoyu bibliotekacılar, Kultura Evlerin başları, teatrucular, oyun hem türkü kolektivlerindän katılannar koydular ortaya kendi problemnerini hem soruşlarını, umutlanarak, ani onnarı işideceklär, inanarak, ani normal işlemäk için verilecek lääzımnı ortam hem ödek.

   Burada urgulandı birkaç kerä, ani devlet, angısının yok kulturası, angısı kulturaya finans ayırêr “kalan para” prinţipinä görä – var nasıl yok olsun hem kaybetsin devletliini.

İlgili Fotoğraflar
Sağ üst butonu tıklayarak geri dönebilirsiniz...