Kızlar arasında voleybol Beşgözdä
2271 defa okunmuş - 23 Mayıs 2014 - Cuma 11:56

  May ayın 11-i beşgözlülerä hem küüyün musaafirlerinä deyni çok vakıda aklılarında kalacek. Seftä burayı geldilär altı kız takımı yarışmak için. Voleybol turnirini adladılar Hederlez yortusuna, küüyün klisesinä, ani taşıyer Ayoz Georgiyin adını. İkinci yıl sıravardı trenerin Semön Kösä iniţiativasına görä geçirlener oyunnar kubok için. Turnirin ayırı gözellii vardı, çünkü yarışmaa geldilär takımnar  Çimişliya, Çadır-Lunga, Kıpçak, Baurçu,Kazayak, Balaban küülerindän. Ofiţial açılışa katıldılar başkan Mihail Formuzal, Moldova Parlamentindä deputat Pötr Vlah, GHT deputaları h.b. önderdilär dä. İlkin söz  tuttu primar Nikolay Gotişan, sora hepsini selamnedi hem başarlar diledi başkan. Hepsi gelän musaafirlär nışannadılar voleybol oyunun önemni olduunu hem oyunculara diledilär başarıları.

   O günü halizdän dä yarışmalar pek islää geçti. Oyunnar hem sprotçuykaları hem siirediicileri sevindirdi. İlk eri kazandılar kızlar Çadırdakı M.Guboglunun adına liţeyindän, elbetki onnara verildi kubok. İkinci oldular kızlar Çimişliyadan, üçünvü erä da çıktılar ev saabileri – Beşgöz takımı. Hepsi takımnara verildi baaşışlar, medalilär, seçildi en ii oyuncular. Yarışmayı hazırlayannar şükür ederlär sponsorlarını iş adamını Bratanı hem başkalarını da, ani seslendilär hem katkıda bulundular deyni bu işi yapmaa. Hepsi oyun takımnarına deyni hazırlandı sofra. Trenerlär şaştılar hem sevindilär  ona da, ani Moldova Parlamentindä deputat Pötr Vlah hazırlamıştı baaşışlarını hem para premiyalarını, ani onnar çok kuvet koyerlar deyni gençlerimizi terbiyetmää, onnara sport dalını sevdirmää.

 K.Kurdoglo

 

İlgili Fotoğraflar
Sağ üst butonu tıklayarak geri dönebilirsiniz...