Gagauz dilindä XXV-ci Respublika olimpiadası
1532 defa okunmuş - 21 Mayıs 2014 - Çarşamba 14:07
   Mart ayın 10-dan 12-nä kadar Komrat kasabasında geçti gagauz dilindä XXV-ci Respublika olimpiadası. Bu olimpiadada pay aldı 61 üürenici  IX, X, XI hem XII klaslardan Çadır, Komrat hem Vаlkaneş dolaylarından.  Onnarın arasından 20-si – XII-ci klasta üürenän  üürenicilär.
  Olimpiada geçti 3 turda: yazdılar test  yaradıcılık daavasınnan (esse), onnara verildi viktorina soruşları gagauz halkının istoriyası, kulturası, adetleri temalarında, geçti peet okuması. Bizim Baurçu teorertik liţeyin XII-ci klasın üürenicisi Çernioglo Anastasiya katıldı bu yarışmaklara da kazandı I-ci eri. Bu verer ona kolaylık kurtulmaa bu predmettä bakalavra ekzamenindän. Hazırladı üüreniciyi olimpiadaya gagauz dilindä hem literaturasında üüredici Çernioglo M.V.
  Anastasiya hepsi predmetlerdä etiştirer islää üürenmää. Sistematik ayırêr vakıt sporta, oynêêr liţeyin voleybol sekţiyasında. Sport takımın içindä dä başarılı sayılêr. Pek isteer hem beener çok üürenmää, çekettii işi başa çıkarmaa.     Üürenmäk yıllarının içindä kazandı çok diplom bilgileri için hem kendini islää götürmesi için, liţeyin hem küüyün yaşamasında aktiv pay alması için. Bu yıl respublikan olimpiadasında birinci eri kazandıı için devlet ekzamenini gagauz dilindä o vermeyecek. Onun anası gagauz dili üüredicisi Mariya Vasilyevna Çernioglo çok çalıştı, ki ermää uşaana bilgi evdä hem üürenmäk proţesindä, ki büün etişmää bölä sevinçli uura. Dua edelim Anastasiyaya bakalavra ekzamennerindä başarılı olsun hem istedii universitetä sevdii  zaanaatına görä girsin üürenmää.  
Mariya Çernioglo
Sağ üst butonu tıklayarak geri dönebilirsiniz...