PASKELLÄ GELDİ KAPUMUZA! HOŞ GELDİ!
1775 defa okunmuş - 20 Nisan 2014 - Pazar 13:37

    Bucakta yaşayan gagauzlar hem buralı başka milletlär Paskelleyi ayırı yortu olarak eveldän beeri tutêrlar. O üzerä şen hem şıralı renkli yortu üç gün sıravardı bakılêr.

    Büük gün başlêêr klisedä paskaları hem boyalı yımırtaları okutmaklan, saalık için dua etmäklän. Taa ileri, klisedän dönärkän, ilkin insan uurarmış yakınnarın mezarlarına, neredä brakarmış okunmuş paska hem yımırta. Taa sora da artık evdeki sofra kurulması başlarmış.

    Yılın en uzun hem en zor tutulan “Paskellä orucu” insannarın içini temizleer, yaşandıı her gün için düşündürer, derin konuların maanasını annamaa çalıştırêr. Sonunda ev saabiykaları pek büük hazırlıklarlan Paskelleyi karşılêêr. Yapêrlar çok hem datlı imekleri. Sofraların büük payını kaplêêr etli imeklär, angıları inmäzdilär oruç vakıdında. Önemni et imeklerindän var nasıl sıralamaa suannı, kaurma, paça, süüş.

   Elbet, taazä eşilliklär dä renk katêrlar donanmış sofralara, burada olêr türlü salatalar, kıyılmış mezelär erleştirili gözäl donaklı çinilerdä. Paskellä sofrasına yakışêr türlü-türlü tatlılıklar. Kimileri savaşêr mutlak kendi ellerinnän onnarı hazırlamaa, ama çoyu şindiki zamanda satın alma tatlıları da buyur eder.

   Paskellenin ilk günündä, adetä görä, gidiler mezarlaa. Sora kumilär yapêrlar hazırlıklarını, aniki gitmää saadıçlarına. Bu önemni tradiţiya, angısını tutêrlar diil sade eni evlenennär, ama eski çiftlär dä. Yannarında götürerlär kendi ellerinnän yapılmış paska hamurundan kolaç, üstündä süüş tauk, boyalı yımırta hem bir garafa şarap. Gözäl sofra başında tatlı laf konuşulêr, bütün ürektän yapılmış imeklär iniler. Uşaklar kapu önündä yada sokakta yımırta oynêêrlar. İkinci günü hep ölä hazırlıklarlan evli çiftlär giderlär musaafirlää kendi analarınabobalarına.

  Üçüncü gün yortu bitmeer, kalaba aylelär butakım etiştirerlär biri-birini dolaşmaa, Ayoz Paskelleylän kutlamaa. Paskellenin ilk günündän sora herkezi biri-birini 40 gün butakım selemneer: “Hristos dirildi!” – “Hakına dirildi!”

“Meydan” gazetasının kolektivi bütün ürektän kutlêêr okuyucularımızı bu aydın hem ayozlu yortuylan!

 

Sağ üst butonu tıklayarak geri dönebilirsiniz...