Pelik – kızlara gözellik!
1159 defa okunmuş - 07 Nisan 2014 - Pazartesi 10:07

  Baba marta ayın 8-i için Baurçu Kultura evindä geçirildi konkurs liţey kızların arasında. “Pelik – kızlara gözellik!” konkursunda pay aldılar 5-9 klaslardan kızçaazlar, hepsi 12 kişi. Hazırlanan programa doluydu, yarışmacılar lääzımdı geçsinnär edi etap. Bütün avşam yarışmaylan barabar siiredicileri sevindirdilär hem şennendirdilär türkülerinnän Stefanida Filçeva, Valeriy Narlı, Karina Kadın h. b. Haliz insannarın havezlerini kaldırdı oyun grupası “Güneşçik”. Bu küçük kızçaazlardan grupayı topladı hem kurdu genç speţialist, Pedagogika kolecin üürenicisi Evdokiya Kristeva.

  Yarışmacılar sţenadan gösterdilär kendilerini nicä becerikli ev saabiykaları, aşçılar, reklamacılar, türkücülär h. b. Pek beenildi konkursun o payı, neredä kızlar yarıştılar peliklerinin uzunnuuna. Burada kazandı iki yarışmacı birdän – 90 santimetralık pelik saabileri Tatyana Koltuklu hem Ekaterina Kristeva. Jüri azaları: A. Ergoglo, K. Kurdoglo, M. Karaseni, A. Kurdoglo, S.Afatarlı çalıştılar tarafsız hem doorulukçu olmaa, çünkü ayırmaa en iisini her adımda pek zordu.

  O avşam ii sözlär sölendilär konkursu hazırlayannarın adına, liţeyin öndercisinä, Kultura evinin muzıkacılarına Stefanida Kurdoglo, İvan Kurdoglo, Semön Koçancıya. Herzaman gibi, programayı gözäl götürdü üüredici Tatyana Koçancı. Hepsi konkursların çıkışlarına görä yarışmada kazandı 8-ci klastan üüreniciyka Svetlana Terzi. Baaşış kazandılar Tatyana Koltuklu, Artina Popaz, Praskovya Ergoglo hem Ekaterina Kristeva. Gelennär çok vakıda aklında tutaceklar bu gösteriyi.

Konstantin Kurdoglo

İlgili Fotoğraflar
Sağ üst butonu tıklayarak geri dönebilirsiniz...