İlk bakıştan o görüner bir sıradan adam. Siması karagöz, bezbelli onuştan, ani Bucaan güneşi yaktı onu diil bir kerä. Üzü gülümseer, gözleri yalabıyêrlar. Yalabıyêrlar onnar kısmettän. Soracenız: «Neredän bilersin?» Kendisi bana söledi.
2439 defa okunmuş - 04 Mart 2014 - Salı 10:55

     Vasi Filioglu büük ayın 26-da tamannadı 65 yaşını. Bu yıllar doluydular çalışmaklan, hem diil sade bir tarlada. En ilk onun izmeti – çiftçilik. Uyanêr erken, avşamnen evä etişincä göklerdä yıldızlar peydalanêrlar. Topraa pek sever, okadar, ani ona baaşladı parlak duygulu peetlerini. „Ekmek için söz” – bu yaratma diil fikirdän çıkardılmış, ama yaşamaktan, onu var nicä sade kendi işini aslıdan sevän çiftçi yazsın. Tabiata yakın, onun sesini annayan Vasi Filioglu muzikaylan da taa küçüklüündän dost. Yarattı diil bir türkü, angılarını hem başkaları, hem o kendisi eşinnän da çalêr. Eşi Pelageya Mihaylovna da peetçi. Açan Vasi Filiogluya sordum: „Duyêrsınız mı kendinizi kɪsmetli?”, o bana hepsini bunnarı gülümseyeräk cuvap erinä sıraladı. Ama bunnar sade bir payı, var taa bir sevinmelik tä, angısını baaşladı kendisinä hem okuyuculara peetçi – eni toplumu „Hoş buluştuk”. Burada da sürprizsiz geçmedi! Eni kiyadın bir bölümündä Vasi Filioglu şakalı annatmaları erleştirmiş, genä da süjetlär hergünkü aslılıktan alınmış, işidilmiş düüncülerdän, kır işindän gelän insannardan, yaşlılardan hem gençlerdän. Halk aarifliini hem cümbüşlü istoriyaları toplayıp kiyadın sayfalarına, okuyuculara dostlukça danışêr hem taa çok kerä danışacek anılmış Vasi Filioglu.

Elena Mokanu

İlgili Fotoğraflar
Sağ üst butonu tıklayarak geri dönebilirsiniz...