Şindiki zamanda insannarın çoyu savaşêr türlü-türlü gözelletmää rubalarını: dikişlärlän, örgülärlän, pusküllärlän h. b. Dikilmä koraflar donadêrlar bizim bluzlarımızı, fistannarımızı, masa üzlerini, çarşafları. Hiç düşünämeeriz, ani çok incä işlenmiş motivlär, angılarını göreriz dikişlerdä – kalma bizim evel kulturamızdan.
1642 defa okunmuş - 03 Mart 2014 - Pazartesi 10:01

    Mariya Afanasyevna Dülger – bu zenginnikleri koruyannardan hem ilerledennerdän biri. Taa küçüklüündän o beenärdi karışmaa avşam sidänkalarına. Uzun kış avşamnarınnan gagauz karıları yaradardılar şaşılacak halk zenginniklerini: dikärdilär, örädilär, yapaa işlädilär. Bu işleri yapmaa gençleri dä üüredädilär.

    Sidänkalarda iş yapardılar halk türkülerini çalarak. Annadardılar gagauzların yaşamasından legendaları, eski olaylarlan baalı annatmaları. Gözleri dinnendirmäk aralarında halk oyunnarını da oynardılar. Butürlü oturmaklar büünkü günä kadar braktılar Mariya Afanasyevnanın canında incäzanaata sevgiyi.

    Mariya Afanasyevna işledi buhgalter, uşak başçasında terbiyedici, ama küçüklüktän kalan sevgi el işlerinä üsteledi hepsini. O şindiyä kadar hep aaraştırêr hem yapêr eni dikişleri, ilerlederäk halkımızın adetlerini. 1986-cı yıldan beeri Mariya Afanasyevna aktiv pay alêr Kazayak küüyün folklore ansamblisindä “Sevda”, çalêr gagauz halk türkülerini, maanilerini, baladalarını. Hem onun el işlemeleri burada pek lääzımnı olêr, haliz erini bulêr. Muzey hem “Sevda” ansamblinin odasında interyeri taa estetikalı gösterer bu işlemelär, onnar renklendirer solistlerin halk rubalarını incä ipliklän dikili çiçeklärlän, koraflarlan. Kalêr sade pişman olalım, ani may hiç bişey bilmeeriz bölä altın elli, usta karılar için, nicä Mariya Afanasyevna Dülger.

Elena Terzi, Kazayak

İlgili Fotoğraflar
Sağ üst butonu tıklayarak geri dönebilirsiniz...