Sevgili vatandaşlar! Şükür Allaha, te aykırladık taa bir Eni yılın kertiini. Bizä deyni bu kertik hem bölä kertiklär verildi, diil sade vakıdı saymaa deyni, ama, onnara geldiynän, ardımıza dönüp, bakalım, ne etiştirdik hem ne etiştirmedik yapmaa bu vakıtta.
1605 defa okunmuş - 05 Şubat 2014 - Çarşamba 13:45

  «AYDINNIIN» ilk adımı — Ay- Boba Mihail Çakirin biografiyasının çıkmasına yardım. Bu yıl tamannandı 75 yıl, nicä geçindi gagauzların apostolu. Umut ederiz, ani ötää dooru da Ay- Bobanın dualarınnan bu uurda yapılacek çok iş. Canavar ayının 20-dä Moskvada bu kiyadın prezentaţiyası geçti. Güzün biz danıştık Başkana, ani Kişinövda Ay-Bobanın evinä asılsın bir tabla yada bir barelyef koyulsun, ki hepsi bilsin, ani orada yaşadı anılmış gagauz protoierey. 2013 yılda bu iş yapılmadı, umut edecez, ani 2014-tä olacek. Eer Gagauziyada para olmarsa bu işä, aarayacez yardımcı, kimä deyni bu para çok görünmeyecek.

  Başka adım — «Kolada- 2014» yarışması, angısı bitecek Büük ayın 18-dä. Bakmayarak ona, ani bu iniţiativayı pek sıcak karşılamadı o insannar, kim lääzımdı karşılasın, bu yarışmaya katıldı üz uşaktan zeedä kişi. Yolladılar şiir, esse, resim Kolada için, Ay-Boba için, adetlerimiz için, aylä için, ana için, Gagauz Eri için. Okuyarak uşakların fikirlerini, annêêrsın, ani halkımızın gelecää var. Saa olsun bizim vatandaşımız Vladimir Kroytor, angısı kayıl oldu yardımcı olmaa bu yarışmaya da hazırladı üç smartfon ilk erleri alan çocuklara deyni. Gagauziyanın gençlik fondu da kayıl oldu vermää para baaşışlara deyni.

  Şükür Allaha, ani Kıran ayında yolumuz düştü Bränska, neredä üürener 70 gagauz genci. Nekadar sevinçli oldu buluşmaa bu çocuklarlan hem onnara yardım edän üüredicilärlän. Bränsk devlet çiftçilik akamediyasında kurulan «Kardaşlar » gagauz-rus dostluu topluluu hem «Aydınnık» işbirlii annaşmasını kurdular. Bu annaşmanın ilk faydası — Bränsktan delegaţiyanın Gagauz Avtonomiyası gününä Moskvaya gelmesi oldu. Yakınnarda Bränsk çiftçilik akademiyasında tipardan çıkacek Rus-gagauz sözleşmäk kiyadı, angısı yardımcı olacek onnara, kim isteer üürenmää gagauz dilini.

  Umut ederiz, ani 2014 yıl olacek taa faydalı, getirecek taa çok sevinmelik herbir evä, herbir cana. Allah fikirlesin zor çekän halkımızı, da Eni yılda gagauzlar olsunnar arif hem görsünnär o kolaylıkları, angılarını yollêêr Saabi. Yortularınız kutluca olsun!

VİKTOR KOPUŞÇU, «AYDINNIK» kultura-aydınnatmak cümnä topluluunun başı

Sağ üst butonu tıklayarak geri dönebilirsiniz...