AÇIKLAMALI SÖLEYİŞLÄR
1791 defa okunmuş - 30 Aralık 2013 - Pazartesi 11:47

22. AAÇ MEYVASINDAN TANINIR.

Bu söleyiş var Bibliyada: “Zerä herbir aaç tanınêr meyvasından. Kimsey toplamêêr incir tikenni gümedän eki üzüm salkımı çalıdan” (Evangeliya Lukadan 6:44).

Hem: “Korunun yalancı bilgiçlerdän, ani gelerlär sizä koyun derisindä, ama içlerindän onnar paralayan yabanı. Onnarı meyvalarından tanıyacenız. Acaba tikendän üzüm hem gengerdän incir toplanır mı? Butakım, herbir ii aaç ii meyva yapar, kötü aaç da kötü meyva yapar” (Evangeliya Matfeydän 7:15-17).

Kısadan, söleyişin alegorik maanası şudur:  insana sud kesmää lääzım diil onun laflarına yada rubasına görä, ama işlerinä görä.

Türk. Her ağaç meyvesinden tanınır.

23. AÇ GÖZLERİNİ, AÇARLAR GÖZLERİNİ.

Yaşamakta lääzım açıkgöz, kuşkulu olasın, inanmayasın herbirini, neçinki dünnedä var kötü neetli insannar da, onnar var nasıl, yanıldıp seni, soksunnar büük belaya. Bizim aydınnıcımız Mihail Çakir yazardı: “Be, kardaşlar-gagauzlar, olun fikirli, olmayın ahmak, nicä aldanmış bir koyun, ani keçinin ardısora gitmiş da çok lobut kabul etmiş” (Hakikatın sesi. № 15).

Türk. Aç gözünü, açarlar gözünü

 24. ADAMA DE ÜZ KERÄ “DOMUZ”, ÜZ BİRİNCİ KEREDÄ O GROHLAYACEK.

Sözün küvedi büüktür. İnsana bir işi dayma sölärselär, o insan yavaş-yavaş sınaşêr buna da başlêêr olmaa ölä, nicä ona deerlär. Bu laflar girer onun fikirinä.  

Türk. Bir adama kırk gün deli dersen deli olur.

 

Sağ üst butonu tıklayarak geri dönebilirsiniz...