BENİM SEVGİLİ İNSANNARIM
Benim dädum – Andrey Mihayloviç Orman, babum – Elena Vasilyevna Orman. Biz hepsimiz yaşêêrız Baurçu küüyündä.
1832 defa okunmuş - 25 Aralık 2013 - Çarşamba 12:32

   Diil çoktan, kasım ayının 7-dä, onnar kutladılar bir gözäl yıldönümünü – oldu artık 50 yıl, nasıl onnar yaşêêrlar bilä, yarım asir geçti, nicä evlenmişlär. Andrey dädu hem Lena babu büüttülär hem üürettilär 5 uşak, angılar hepsi artık evlendilär hem aylelerini kurdular. Sevinerlär büünkü gündä 12 unukalarına hem bir unukanın uşaana.

  İkisi dä çoktan pensiyada bulunêrlar. Sıkça aklılarına getirerlär, nasıl çok işlemişlär kolhozda. Dädum işlemiş soför, babum sıradan işçiymiş. Şükürlüyüm onnara, ani büütmüşlär benim anamı, onu, nicä dä bobamı, bän pek severim.

  «Altın düün» yubileyini kutlamaa toplandı dädunun hem babunun hepsi uşakları hem unukaları. Geniş aylenin arasında, donadılmış sofra başında yubilärlar pek mutlu görünärdilär. Sölendi çok gözäl laf, şiir, türkü, verildi baaşış, oynandı oyunnar. Bana görä, yortunun en meraklı eri oldu, açan en küçük oolları baaşladı anasına-bobasına bir avtomaşina. Babu hem dädu sevindilär, ama dedilär, ani onnar için en büük baaşış – uşakları hem unukaları.

  Bän bütün ürektän kutlêêrım dädumu hem babumu yarım asirlik yıldönümünnän. Dua ederim onnara bütün ürektän saalık, uzun ömür, raat hem bereketli yıllar. İkisini dä pek beenerim, sevinerim onnar için.

  Vera Kuţar, 7-ci B klas

Sağ üst butonu tıklayarak geri dönebilirsiniz...