Gagauz kultura günneri Odesada kutlandı geniş, gözäl hem unudulmaz.
1489 defa okunmuş - 24 Aralık 2013 - Salı 16:55

  Ceviz ayının bitkisindä Odesada gagauz kultura günneri başladılar teatru gösterisindän. Spektakliyi, angısını oynadı Çadır kasabasından Gagauz milli teatrusu, siiredäbildik Odesanın Kultura Merkezindä.

   İkinci dünü geçirildi gagauz estrada hem folklor festivali. İlerletti kutlama programasını konţert, angısında pay aldılar folklor hem estrada grupaları Ukrayna, Moldova, Bolgariya, Greţiya hem Rusiya devletlerindän

   İsteerim nışannamaa, nasıl sıcak karşıladılar bizi ukraynalı dostlarımız. Neredäsä düşünmää ettim, ani bizim için bu pek üüsek karşılama. Ev saabileri, öndercilär savaştılar hem geçirdilär bu yortuyu ”pek islää” sölärsäm, az söleyecäm. Bizä hepsimizä gösterildi büük saygı hem hatır. Şükür ederiz hepsinä, kim düşündü, savaştı hem geçirdi gagauz kultura günnerini. Gagauz teatrunun gösterisi okadar beenildi, ani siiredicilär taa bir kerä istedilär onu siiretmää.

   Gagauz Kultura günnerini Ukraynada düşünerlär geçirmää bundan sora her yıl Odesada hem Bolgrad kasabalarında. Festivalin şannı musaafiri oldu Ukrayna Parlamentinin deputatı Anton Kiose. Gagauz Kultura günnerini geçirmää deyni iniţiativayı getirdi Odesa oblasti sovetinin deputatı, bizim vatandaşımız Yuriy Dimçoglo.

   Gagauz Kultura günneri geçtilär sentäbrinin 20-dä hem 21-dä. Bu gözäl sırayı düzxennemää yardım ettilär Odesa oblasti gubernatoru Eduard Matviyçuk, Ukrayna gagauzların dernää «Birlik» hem Ukraynalı Gagauzlar birlii.

 

   Elena Danacı

 

 

 

İlgili Fotoğraflar
Sağ üst butonu tıklayarak geri dönebilirsiniz...