GAGAUZİYADA GEÇTİ MOLDOVANIN BİRİNCİ UŞAK ÇEMPiONATI KiOKUŞiNKAY KARATESINDA
1334 defa okunmuş - 15 Kasım 2013 - Cuma 01:38

Artık edinci güz sıravardı SK «Sacura» Çadırda geçirer uşak turnirini kiokuşinkay karatesında. Yıl-yıldan burayı hep taa çok pay alan Moldovadan hem Gagauziyadan katılêrlar. Bu yıl turnir kabletti Moldova Respublikanın uşak çempionatı statusunu «Biyaz samuray». Çadırlılardan kaarä, geldilär Komrat, Kagul, Kantemir, Belţ, Aneniy Noy, Kişinöv takımnarı da. Yarışmalara katıldılar 5-15 yaş arası üz sportçudan zeedä. Çempionat yapıldı MR Kiokuşinkay karate federaţiyasının, Gagauziyanın gençlik hem sport bakannıın, «Ceadır-Cuvet» asoţiaţiyanın hem «Sacura» sport klubunun yardımnarınnan. «Sacura» klubunun baş treneri Oleg Çebotar açıkladı, ani çempionatın neeti – ayırmaa en kuvetli sportçuları, ki ileriyä dooru kurmaa Moldovanın toplu takımını. Kär onnar sora gideceklär devletimizin adından Evropa hem Dünnä çempionatlarına. Yapılan çempionatta medalilerin çoyunu kazandılar çadırlı sportçular: 13 altın, 9 gümüş, 3 bronza. “Bölä başarılı uşaklar olabildilär, çünkü inanêrlar kendilerinä. Bizim en küçük medali kazanan sportçumuz 5 yaşında”, – söledi Oleg Çebotar. Sportklubun ikinci treneri Grigoriy Radukan dedi, ki bakmayarak ona, ani çadırlı karatecılar gösterdilär islää hazırlıklıını, lääzım durgunmasınnar, neçin deyni yakında «Sacura» karatecıların plannarında var katılmaa çempionata Ukraynada, angısı olacek bu yılın dekabri ayında. Karate çempionatını hazırlayannar şükür ederlär sponsorlarına, Gagauziyanın Gençlik hem sport bakannıına, ani çok yardım verdilär geçirmää bu çempionatı hem ani baaşladılar büük hem kaliteli tatami.

 

Natalya Çebotar

Sağ üst butonu tıklayarak geri dönebilirsiniz...