UŞAK OYUNNARI ŞENİİNÄ GAGAUZLAR DA KATILDI
-1
2143 defa okunmuş - 29 Haziran 2013 - Cumartesi 14:59
Bu festivalä Altaydan, Azerbaycandan, Bosnadan, Gagauziyadan, Makedoniyadan, İraktan (türkmennär), Kırımdan, Kazahstandan, Kirgizistandan, Tataristandan, Türkiyedän 8-är uşak katıldı.  Burada uşaklara eski oyunnarımız üüredildi (aşık, 5 taş, 9 taş, çelik, yakar top, 7 keremit), bitkidä dä uşaklar bir-birinnän yarıştı. Bu oyunnarın içindän beşi taa ileri gagauzlarda oynanardı. Proektin neeti yaymaa bu eski türk oyunnarını Türk dünnesindä hem birleştirmää Türk dünnesinin uşaklarını. Proekt İsmail Gaspıralının “Dildä, fikirdä, iştä birlik” devizinnän geçti.
Bir dildä lafedän bu uşaklar Türk dünnesinin nekadar büük olduunu annadı hem çok dost edindi. Hepsi uşaklar medali hem diplom kabletti.
Her gün uşakları türlü erlerä götürdülär: iilenmäk erlerindä dinnendilär, türlü baaşışlar kablettilär, Türkiyenin Üüretmäk bakanınnan buluştular, aaç diktilär, konțert verdilär.
Bu proekt Astana Yunus Emre İnstitutu hem Eskişehir Valilii tarafından yapıldı. Gelän yıla bu şennik Tataristanın Kazan kasabasında geçirilecek.
Gagauz grupasını topladı hem oyunnara hazırladı Güllü Karanfil hem Gagauziya Gençlär Regional Konsiliumun müdürü İgor Kroytor. Meras Cümnä topluluu hem Gagauziya Gençlär Regional Konsiliumu gelän yıla bu proekti Gagauziyada gerçekleştirmää karar aldı.  
Güllü Karanfil

Sağ üst butonu tıklayarak geri dönebilirsiniz...