Kortendä turnir
-1
1163 defa okunmuş - 25 Mayıs 2013 - Cumartesi 14:20
Bitki yıllarda bizdä voleybol başladı populär olmaa karılar arasında da.   
Liţeylerin çoyunda kız voleybol takımnarı var. Küülär hem üürenmäk kurumnarı aralarında sık yarışmaklar yapılêrlar.
 Aprildä Çadır dolayında başladı geçirilmää voleybol turnirleri. Çadırdakı V. Moşkov adına liţeyin takımı becerekli hem gözäl voleybol gösterdi.  Başkalarından ustalı tehnikaylan ayırılardı, kazandı 1-nci  eri da dolayın çempionu oldu.
Bän çoktan gözlederim bu takımın ilerlemesini, angısını hazırlêêr Uşak hem Gençlär Sport Okulun №2 treneri İ.İ. Dimitrov. Bitki zamannarda onun çalışmalarınnan bu takım ilk erleri başladı almaa. Moldovada
3-ncü oldu, Çadır dolayında çemponnuu kazandı, geçennerdä dä kaavi hem profesional oynayan Korten takımını ensedi. Bu turnir her yıl yapılêr tradiţiyaya görä Paskellä yortusuna karşı. Hazırlêêr onu üüredici hem trener A.P. Jeläzkov. Bu turnirdä hepsi takımnar biri-birindän aşaa kalmêêrlar. Ama siiredicilär üüsek notaladılar Korten hem Çadır takımnarının oyununu. Tehnika hem taktika ustalıı hepsini şaştırdı, ancak beşinci partiyada  belli oldu tarayannar – 3:2 sayıylan kazandı Çadır-Lungadakı V. Moşkov adına liţeyin toplu takımı, o aldı kupayı. İkinci erä çıktılar ev saabileri – Korten takımı, üçüncü dä  Kaul takımı oldu. Turnirdä pay alannar beendilär yapılan hazırlıkları, hem organizaţiya tarafını, hem karşılamayı bütündän. Şükür ettilär Korten küüyü primarına A.N. Taukçiyä, liderä N.N. Gurgurova, trenerä A.P. Jeläzkova sıcak musaafirlik için.

Sağ üst butonu tıklayarak geri dönebilirsiniz...