Baurçuda – Voleybol Turniri
-1
1109 defa okunmuş - 22 Nisan 2013 - Pazartesi 12:15
Altıncı yıl sıravardı fevralın başında Baurçu lițeyin sportzalında geçer voleybol turniri kız takımnarı arasında. Bu yarışmaların inițiatoru teoretik lițeyin fizkultura üüredicisi Konstantin Kurdoglo. Turnir adlanêr lițey üürenicisi Anna Dmitrioglonun anmasına, angısı şkola takımının kapitanıydı. Onun käämil oynaması verdiydi kolaylık Baurçu takımına seftä istoriyada almaa ilk eri rayonda. Pek yazık, ani Anä gözäl yaşında tragig kaybetti ömürünü avtokatastrofada.  Anänın anası hem bobasu raametli kızının hatırına kurdular bir kubok hem her yıl olêrlar bu turnirin sponsorları. Lääzım sölemää, ani yarışmalara herbir katılana veriler gramota hem para ödülü.  Bu yıl turnirä katıldılar kaavi takımnar – Moldova çempionu – Korten sport şkolası, Kagul hem Çadır-Lunga, angıları oldular prizör Moldova çempionatında, Valä-Perja, Tomay takımnarı hem, belliki, saabilär – Gagauziyada ilk eri alan Baurçu lițeyin takımı.  
Yarışmaların organizatoru Konstantin Kurdoglo herbir işi islää düşünmiş: takımnarın erleştirilmesini, turnirin açılışını, oyunnarın geçişini, siiredicilerin erlerini, zalın donaklanmasını h. b.
Turnirin açılışında hepsi altı takım dizildil sportzalın geniş meydanında. Kazanılmış kubokların yanında durardı lițey takımın kapitanı Alina Kösä, tutarak elindä Anä Dmitrioglonun patredini. Katılannara selämnemäk  sözünnän danıştılar lițeyin öndercileri, Anänın senseleleri. Hepsi katılannar hem siiredicilär andılar Annayı bir minut susmaklan. Bundan sora söz aldı Çadır-Lunga dolayın gençlik hep sport işleri baş uzmanı G.V. Arabacı. Sora K.İ. Kurdoglo kısaca annattı kendi üüreniciykası için, kimin adını taşıyêr turnir, annattı hepsinä turnirin reglamentini hem diledi başarılar.
Çeteleyä görä takımnar bölündülär iki grupaya. Yarışmalar geçtilär göstereräk  keskin hem interesli tehnika momentlerini. Grupalarda ensedilär Korten hem Kagul takımnarı, onnar  karşılaştılar finalda, gösterip gözäl hem kombinațiyalı oyun. Turnirin enseyicisi oldu Moldova çempionu – Korten takımı. İkinci eri aldı Kagul takımı, üçüncü – Çadır-Lunga, dördüncü – Baurçu, taa ötää dooru – Valä-Perja hem Tomay. Herbir takım kabletti para ödülü, grupaların en ii oyuncuları kablettilär baaşış. Turnirin kapanışında trenerlär hem oyuncular şükür ettilär organizatorları regional yarışmaların üüsek uurda geçirilmesi için.
Bitkidä isteerim sölemää taa bir iş için. Türnir taa çeketmediinän, baurçulu voleybolcuykalar dolaştılar Anänın mezarını, susarak koydular çiçek, gösterip, ani unutmêêrlar bu gençecik kaybelän kızçaazı hem onun küüdä sport için yaptıklarını. Bu pek gözäl bir adet hem insannık örnää.
Konstantin
Kurdoglo

Sağ üst butonu tıklayarak geri dönebilirsiniz...