Gagauz uşakları Türkiyä festivale katılaceklar
-1
1790 defa okunmuş - 14 Nisan 2013 - Pazar 12:00
1979-cu yılı Birleşmiş Milletlär Organizațiyası “Dünnä uşakların yılı” olarak bildirdiydi. TRT  bütün dünnä uşaklarını kucaklamak neetinnän bir proekt hazırladıydı. O proektin kabledilmesindän sora her yıl halklararası uşak  oyun festivali yapılêr. İlk yıl 5 devlettän katılannar vardı, ama bu yıl, artık 35-inci kerä yapılan festivalä, yakın 50 devlettän kolektivlär toplanêrlar.
 2008-inci yıldan beeri “Uşak Şennikleri” festivalinä Gagauziyadan da uşak kolektivleri katılêrlar.  “Gençlik” (Valkaneş), “Altıncık” (Tomay) hem bitkii yıllar sıravardı  “Dostluk” (Kazayak) grupaları Antalya, İzmir, Bursa, Konya kasabalarında yapılan festivalä giderlär. Bu proekti  altı yıl geeri başlattı bizim küü deputatımız İvanna Köksal, ama pek mutluyuz, ani deputatlıktan sora da o brakmadı bu işi. Her yıl festivaldä yaşayan unudulmaz 10 gün için uşaklar havezlän hazırlanêrlar hem sabursuz bekleerlär momenti buluşmaa dünnä uşaklarınnan, artık dost olan türk aylelerinnän.
       Festivalin neeti: dünnä uşakların aralarında dostluk, kardaşlık, sevinmelik hem şennik duygularını büütmää, genişletmää. Birliktä, uslulukta, annaşmakta yaşamaa hem kendi halkını, onun kulturasını tanıtmaa – bunnar festivalin hem organizatorların baş neetleri.
 Bu yıl da 12 kişilik “Dostluk” folklor grupası çiçek ayın 13 – 25 günnerindä İzmirdä hazırlanan festivaldä  bulunaceklar. Grupanın başında Aleksandra Balta hem horeograf Afanasiy Gargalık olaceklar.
         Festival günnerindä uşaklarımızı türk ayleleri musaafir edeceklär. Her gün uşaklar meraklı programalara katılaceklar. Grupadan bir kişi Ankarada prezidentlän, başbakannan, parlamentin başınnan, TRT genel müdürünnän ofiţial buluşmalara da gidecek.
        Festivalin finalı olacek çiçek ayın 23-ndä yapılan Gala-konţert, neredä her devletin uşakları göstereceklär kendi oyununu. Hepsi gösterileri dünnä devlet televizionnarı cannı yayınnayaceklar. Biz dä gagauz uşaklarının oyunnarını, nicä her yıl,  Gagauziya Cümnä televizionun kanalından siiredäbiliriz.
Not: Uşakların festivalä katılmaa kolaylıı olduu için TRT kurumuna şükür ederiz!
 Hepsi yol harcamalarını üstünä alan  TC ”Yurtdışı Türkler ve Akraba Toplulukları Başkanlığına” saa olun deeriz!
Aleksandra Balta.
Kazayak küüyü,
”Dostluk” kolektivin başı
Sağ üst butonu tıklayarak geri dönebilirsiniz...