GERÇEKLÄR MEYDANA ÇIKÊR
0
1098 defa okunmuş - 28 Şubat 2013 - Perşembe 13:22
Bir yol annatmasınnan başlayacam.
Biz Moldovanın içindä, küçük bir avtonomiyada, dünnäda – ikiyüz binnik topluluklan bilinän halkız. Ama haliz köklerimiz binnärcä yıl hem binnärcä kilometra uzaklarda kalêr. Kulturamız – hiç bir halktan aşaa kalmayacek kadar zengin, çalışkan ellerimiz - en az her halk gibi iş başarıcı, duygulu, şen hem gururlu insannarız.
Gagauzluk –  küçük topluluk diil, küçük halk diil. Gagauzluk –  büük bir kulturanın, büük bir geçmişin adıdır. Gagauziya sa üzlärcä  yıl kendilerinä Vatan oluşturmaa savaşan gagauzların son konakladıı eri sayılêr. Gagauz halkı tırnaklarına kadar yaşamaktan tutunan bir halk. Her zoorluu gözü göreräk, canını, malını, Vatanını korumuş kahraman insannar olarak biliner. Halkımız bitki üzyılda dünneyin diişilmelerindän, globallaşmasından,  şüpesiz,  bir taraftan çeşitli faydaları  alarkana, öbür taraftan da kendi kulturasını kaybetmää, kendi geçmişindän kopmaa hem kendi geleceeni düşünmemää  başladı.
Sayêrım hem inanêrım, ani dünnädakı tehnologiya, ekonomika, soţiologiya ilerlemelerindän halkımız kendi payını nasıl alacek bilsin lääzım. Genä da düşünerim, ani  bunnarlan birliktä kendi inanmalarını, adetlerini kendi erini nasıl koruyaceklar insanımız bilsin lääzım.
Hepsi bunnar nasıl yapılacek? Gagauz aydınnadıcılarımızın sık-sık bir platformada halklan buluşmasınnan. Bu nasıl yapılacek? Kendi öz dilimizlän, üreemizlän, isteklerimizlän ortaya koyacaamız “Meydan” gazetamızlan.
Meydan – kulturamızın geçmişin, gelecään garantiyası olacek. “Meydan” Ana dilindä bizim  sizinnän sesimiz olacek. Hepsi “Meydan” yazarların adından bu ilk sayıda sizi sevgiylän selämneerim. Meydana saap çıkacaamıza hem onu birliktä büüdeceemizä inanêrım. Hepsimizin yolu açık olsun!
İvanna Köksal.
“Meydan” gazetanın
baş redaktoru.
Sağ üst butonu tıklayarak geri dönebilirsiniz...